Mar 4 | TPA | STEP | Yesu vihanahanapu i vikarenameei, Galilee hagahagana auririvana. Ma rava maghamaghauhi hi garibewani, aubaina po au wam i geru ma i verauhopu au bogei. Ma rava atapuhi yana au geraha.

Mark 4

Dowa Wahepari Ampariruvaruvana*

(Matthew 13:1-9; Luke 8:4-8)

1 Yesu vihanahanapu i vikarenameei, Galilee hagahagana ^{▼▼4:1topana} auririvana. Ma rava maghamaghauhi hi garibewani, aubaina po au wam ^{▼▼4:1waga} i geru ma i verauhopu au bogei. Ma rava atapuhi yana au geraha. 2 Ampariruveruvei ^{▼▼4:2awana'ina} i babani, ma ginauri maghamaghauna i vihanahanapuhi ipa, 3 “We ona nonori, tauraupehi i hopu vao aubaina, 4 po ana pehi i vihuruhi, ma ghehauhi yana tayaha auririvana hi pe'u, po kiu hi anihi. 5 Ma ghehauhi yana dowa waigha'igha'imana auwarina hi pe'u nahidana yana egha dowa ghaeghaena, po pehina egha davona ma hi raupiharehi, 6 ma egha dedehi hita gha'ira dowa auhinenina, po maranai madegha i ghe'eta yana i boyahi po hi po'i. 7 Ghehauhi yana ra'wau au toyana hi pe'u po hi raupiharehi, ma yamhi yana yavana i vi'apo'apoenihi, po egha hita rau'ano. 8 Ma ghehauhi yana dowa ahi'ahina auwarina hi pe'u, po hi ghe vaimaiha, ma ghehauhi anohi 30, ^{▼▼4:8maghahauhi} ma ghehauhi 60, ^{▼▼4:8hi veraumagha} ma ghehauhi 100.” ^{▼▼4:8maghamaghau dumahi} 9 Ma i riwehi ipa, “Inapa waitanighami yana aiwa a ririweiya ona nonori.”

Yesu Ampariruvaruva Anona i Babaniei

(Matthew 13:10-17; Luke 8:9-10)

10 Mara ghehauna, Yesu a tauvotagho ma rava ghehauhi, ampariruvaruva* aubaina hi raubayadei. 11 Ma i amparibeeyana ipa, “Taumi ravamina a vi'aninemi po Maimaituwa a vitaniwaga vouna, tuyeghana govagovaghana ai heghemi. Ma tauhi taumae uputa ^{▼▼4:11egha tauvitumaghana} auwarihi yana apegha ina raughadari, ma ampariruveruvei auwarihi a vibabani. 12 A dewai po peroveta wadubona, aiwa i ririweiya ina raimoinai,

‘He ina'inana ma egha hita ina'inana tuhagha,
ma he rautanighana ma nuwanuwahi
egha ita wanawanaghadari,
yamna aubaina apegha hina wanatavirahi
ma ahi dewabo'a ata nuwa'aharei.’” ^{▼▼4:12Isaiah 6:9-10}

Dowa Wahepari Anona

(Matthew 13:18-23; Luke 8:11-15)

13 Yesu i raubayadehi ipa, “We ampariruvaruvana* auwarimi i raughadaghadari bo e'egha? Ma apo menana'arena ampariruvaruva* ghehauhi auwarimi ina raughadari? 14 Tauraupehi yana me Maimaituwa riwana rava auwarihi e rairahahi. 15 Rava ghehauhi auwarihi yana me pehi tayaha auririvana e pe'upe'u, ma me marana tuyegha hi nonori, yana mara emosi Taumodurere ^{▼▼4:15Tauraudadana}* i vaina aharei. 16 Ma rava ghehauhi yana me dowa waigha'igha'imana, a kaohahi tuyegha hi nonori, 17 ma egha hita vomomota, ^{▼▼4:17vojijina} babana dedehi egha ita amtonana dowa auhinenina. Po maranai tuyegha ahi'ahina hi vaini, ma piripiri ma amparihopuhopu hei aronihi, yana egha davona ma he vootere. 18 Ma rava ghehauhi yana me au ra'wau. We ravahi yana tuyegha hi nonori, 19 ma we dobuna a yawahana hi vinuwaboyana dumei, ma a viguyau ma ginauri maghamagha rauhogharahi, tuyeghana ahi'ahinana hi yavanihi po egha anohi. 20 Ma dowa ahi'ahina yana me rava tuyegha hi nonori, po hi vomomohi ma hi rau'ano, po ghehauhi yana 30, ma ghehauhi yana 60, ma ghehauhi yana 100.”

Rampa Aniterenana

(Luke 8:16-18)

21 Yesu auwarihi ipa, “Rava egha meyanai rampa ^{▼▼4:21odam} gaebei hina vitarada'wai bo ani'eno augaba'urina hina terei. Eghapo, ana au anima'ae hina terei. 22 Purapura govagovaghahi apo hina voghe'etehi, ma humahumahi apo hina kaiwenihi. 23 Inapa waitanighami yana ona rautanighana.” 24 Ma i riwehi ipa, “Aiwa o nonoriya yana ona vi'ate'atei. Ma ona rautanighana vaimaiha ma auwarimi ina raughadari, ma nuwahuyahuya yagana ina veremi. 25 Aiyavo auwarihi, yana apo ina raipotoi ma aiyavo auwarihi e'egha, ma haburuna auwarihi e ma'ama'ae yana apo ina vo'aharei.”

Pehi Raharahana Ampariruvaruvana

26 Yesu ipa, “Maimaituwa a vitaniwaga vouna ana rava auwarihi,* yana me rava pehi au dowa e rairahahi. 27 Marana waguvarai po maratomai, ana eno po a vomahiri auwarina, we pehina i rahai po i ghaeghae, yana egha ita haramanei da me i wawaranei. 28 Dowa tau'avana i dewai po i rahai ma i ghae, po i ra'ata ma i rau'ano. 29 Ma maranai yam i magura, yana tauraupehi rauyam ei kareni.”

Gaga Pehina Ampariruvaruvana*

(Matthew 13:31-32, 34; Luke 13:18-19)

30 Anima ipa, “Apo aiwa ampariruvaruvana* ta vibagibagi po Maimaituwa a vitaniwaga vouna ana rava auwarihi* ta dedei? 31 Maimaituwa a vitaniwaga vouna ana rava auwarihi yana me gaga porana vomuhomuhona. 32 Ma maranai i ra'ata yana eyagi maghamaghauhi au vaovao i ghe aharehi, ma ragharaghana hi ra'ata po auwarihi kiu he raunoghi.”

33 Yesu ani ampariruvaruva* maghamaghauhi we nana'arena, i vibabaniyei rava auwarihi, ma i naiyei po au ruvahi ma hi noonora tuhaghai. 34 Mara maghamaghauna ampariruvaruva* auwarina i babani, ma maranai a tauvotagho tauhi'ava auwarihi yana, aiwa atapuna au habuhabuna i voghe'etei.

Yesu Hauga Apo'apoe i Raidaumori

(Matthew 8:23-27; Luke 8:22-25)

35 Na maratomna emosina aubigaina, yana Yesu a tauvotagho i riwehi ipa, “Ta amkuka damana hagahaga autupo ghehauna.” 36 Tauna yana au wam, aubaina a tauvotagho hi geru, ma patara ^{▼▼4:36rava maghamaghauhi} ghaeghaena au geraha hi voterehi, ma hi vomahiri po hi damana autupo gheha wam ghehauhi maitehi. 37 Ma hive ghaeghaena i vikare, po togowa wam hadana i raviravi, ma waira i rautaghona auhinenina. 38 Ma Yesu yana wam aumurina i vi'unutana ma i eno'eno. Ma a tauvotagho hi raidagui ma hipa, “Tauvihanahanapu egha uta weno, we apo ta hiraghe we'i?”

39 I vomahiri yana hive i eni ma i riwei ipa, “Ma genuwana!” Ma togowa auwarina i riwei ipa, “Rauwa ma voterei!” Anima hive rauwa i voterei ma daumora ghaeghaena i eno. 40 Ma i riwehi ipa, “Aiwa o rovorovoei? Egha ami vitumaghana?”

41 Hi rovo duma ma hi raubayadanameehi hipa, “We ravana aiya'i? Ma i manini ohoota da hive ma togowa hi viponavowei!”